Unha muller de 56 anos, M. V. R. T., resultou ferida ao ser atropelada por unha furgoneta este mediodía na confluencia entre as avenidas Arcadio Pardiñas e Eijo Garay da localidade de Burela.

O incidente, do que o Centro Integrado de Atención ás Emerxencias (CIAE) do 112 Galicia recibiu aviso ás 13.26 horas, produciuse á altura do paso de peóns ubicado fronte ao supermercado da cadena Gadis. Daquela, mobilizou ata a zona persoal de Urxencias Sanitarias-061, do Grupo de Emerxencias Supramunicipal (GES) de Cervo e da Policía Local.

TRASLADADA AO HOSPITAL

A muller caeu ao recibir o impacto do vehículo, conducido por N. P. L., pero o seu estado non parece revestir gravidade. Actualmente atópase en observación no Hospital Público da Mariña.