A Garda Civil detivo na localidade de Ourol a catro veciños de Viveiro de 32, 35, 39 e 55 anos de idade como presuntos autores dos delitos de cultivo de drogas e de defraudación de fluído eléctrico tras interceptarlles unha plantación de marihuana nunha vivenda e 136 plantas.

Segundo informou o Instituto Armado, as detencións practicáronse tras ter coñecemento o pasado mes de setembro de que nunha vivenda situada no termo municipal de Ourol podía haber unha defraudación de fluído eléctrico, “cunhas perdas potenciais por parte da compañía eléctrica distribuidora nos meses de xuño e xullo pasado foron de 1.100 euros”, apuntou.

Por iso, iniciouse unha investigación policial na cal se observou, relata a Benemérita, como varias persoas accedían ao interior dunha vivenda en horas diferentes do día e abandonaban o lugar ao pouco tempo con sacos de substrato e cubos de pintura baleiros en cada visita.

Durante as horas nocturnas, destacaron as mesmas fontes, observouse saír da vivenda “unha luz moi potente“, a cal permanecía acendida durante toda a madrugada.

LÁMPADAS REFLECTORAS DE 600 W

No rexistro domiciliario, os axentes localizaron “unha instalación profesional destinada supostamente para o cultivo de marihuana, na cal utilizaban lámpadas reflectoras de 600 W“, detallou a Benemérita.

Alí interviñeron 136 plantas de suposta marihuana de distintos tamaños e inflorescencias. No rexistro tamén acharon indicios que apuntan a outra instalación desmantelada nun anexo á vivenda.

Durante a investigación na vivenda a Garda Civil verifica, así mesmo, a existencia de “unha complexa instalación eléctrica, compatible coa defraudación de electricidade denunciada pola compañía subministradora”.

INVESTIGACIÓN ABERTA

A investigación continúa aberta e non se descartan novas detencións. Pola súa banda, as persoas detidas foron postas a disposición xudicial.