O Concello de Foz espera comunicación oficial que clarifique se se repatriará o cadáver ou se se enterrará no municipio o corpo de Minaene Franco, a muller asasinada supostamente a mans do seu fillo de 17 anos, de orixe brasileira e nacionalidade española, co que residía no municipio.
O pleno do Concello de Foz acordou o pasado martes decretar tres días de loito en homenaxe á vítima, cuxo corpo foi localizado na mañá do pasado luns no seu domicilio con feridas de arma branca.
O loito comezou ás doce da madrugada deste mércores día 6 e terminará o venres a media noite. Previamente á celebración da sesión plenaria, tivo lugar unha concorrida concentración en homenaxe á muller asasinada e en contra de calquera tipo de violencia convocada polo propio goberno municipal.
Mentres, na mañá do martes levouse a cabo outro acto no instituto de Foz onde a muller estudaba un curso superior de Dirección de Cociña, onde os compañeiros e equipo directivo gardaron un minuto de silencio para renderlle homenaxe.
O Concello acordou tamén unha declaración institucional na que, segundo manifestou o alcalde da localidade, Francisco Cajoto, “o conxunto da corporación lamenta o triste suceso e presunto crime de violencia doméstica, rexeitando calquera tipo de violencia e ao mesmo tempo transmite a súa pésame á familia, coñecidos e amizades da vítima”.
A poboación vai recobrando a normalidade tras o sucedido, segundo apuntou o alcalde, quen unha vez máis lamentou os feitos e resaltou que todo este capítulo produciu unha gran conmoción.
SEN FAMILIARES NA ZONA
Tralo ingreso do presunto autor do crime nun centro de menores, decretado o pasado martes polo Xulgado de Menores de Lugo, a localidade de Foz centra a súa atención no que pasará co corpo da vítima, que non ten familiares na zona.
De momento, segundo sinalou o rexedor municipal, o Concello mantense á espera do que comunique o Xulgado pertinente e a Fiscalía para saber que facer respecto diso. “Estamos pendentes das noticias por parte do xulgado e resto de organismos competentes para saber se procede a repatriación ou que é o que vai pasar”, declarou o alcalde focense.
Así mesmo, o rexedor apuntou que o Concello está en contacto con varios amigos da vítima que están en comunicación coa familia da falecida. Ademais, comentou que o Concello e a parroquia colaboran e realizan xestións por se fixese falta facilitar unha sepultura.