O corpo de Minaene Franco, supostamente asasinada polo seu fillo en Foz, será repatriado finalmente a próxima semana.

Segundo os prazos que baralla a funeraria de Quiroga, prevese que se poida producir antes de que finalice a próxima semana, xa coas xestións administrativas en marcha e todos os documentos listos.

A empresa embalsamou o corpo o mércores e dispón de oito días para proceder á incineración ou inhumación.

A repatriación está pendente da orde do Xulgado para autorizar o traslado e dos permisos sanitarios de Exterior e de Interior, así como do visado do Consulado que xa se están xestionando. E parte da documentación deberá pasar por notaria.

COLECTA BENÉFICA

A Foz chegaron dúas irmás da vítima para facerse cargo do corpo. Ademais, familiares e amigos de Minaene están pendentes da colecta benéfica para recadar fondos para a repatriación, cuxo custo se calcula nuns 13.000 euros. A semana pasada abriron unha conta en Abanca con nome “Conta solidaria con Mina“.

Para acadar máis fondos, a comunidade brasileira organiza unha comida benéfica nun restaurante de Foz rexentado por unha compatriota e planéase un acto benéfico en Madrid para lograr fondos.