Medios de emerxencias foron mobilizados nas primeiras horas deste martes debido a un incendio que afectou a unha casa de dúas plantas no termo municipal de Foz. A medida que foi avanzando a mañá, o lume queimou por completo esa vivenda e tamén chegou ao tellado dunha vivenda lindeira, que colapsou sobre a primeira planta, e ao doutra contigua.
Segundo os datos facilitados polo 112 Galicia, ás 8.15 horas deste martes recibiu o aviso dun particular dun incendio nunha fallado dunha casa de dúas plantas na parroquia de San Martiño de Mondoñedo no lugar do Caritel en Foz.
Foron mobilizados Urxencias Sanitarias de Galicia-061, por precaución; os Bombeiros de Barreiros, GES de Cervo, Garda Civil, Protección Civil e Policía Local.
Debido á magnitude e á rapidez con que se propagaron as chamas, foi necesaria a colaboración dos Bombeiros de Viveiro para atallar o lume, que xa se propagara a outras dúas casas.
Así o confirmou o alcalde de Foz, Francisco Cajoto, que relatou que o incendio comezou no faiado dunha vivenda de dúas plantas na que residía unha muller de 76 anos, que puido saír “sen complicacións” da vivenda tras declarase o lume.
UNHA MULLER DE 76 ANOS, DESALOXADA
Posteriormente, o lume, debido ao vento, pasou á seguinte vivenda, na que ardeu o tellado, que colapsou sobre a planta superior desta casa, na que non había ninguén, e propagouse a unha terceira -en ruínas- que resultou “parcialmente afectada”, concretou o rexedor, que destacou a “impotencia” dos veciños ante o suceso.
Á septuaxenaria residente na primeira vivenda, que resultou completamente calcinada, o Concello de Foz brindoulle “calquera tipo de axuda” e hospedarase coa súa familia directa que reside nunha vivenda próxima.
