EFE. Axentes do Corpo Nacional de Policía iniciaron unha investigación para tratar de localizar a un veciño de Viveiro, Alejandro M. S. I., de 34 anos de idade, do que nada se sabe desde que o pasado sábado pola noite acudiu a unha cea nun restaurante da localidade cun grupo de compañeiros de traballo.
Fontes da Policía Nacional explicaron a EFE que os investigadores están tratando de “seguir os pasos” que puido dar o home desaparecido na noite do sábado para o domingo, cando abandonou o local onde se celebrou a festa. Así, están intentando localizar a toda a xente coa que estivo na cea.
A súa familia informou ao Corpo Nacional de Policía da súa desaparición, preocupada pola súa ausencia e polo feito de que nos últimos dous días non contestou ao seu teléfono móbil.
Segundo aseguran fontes das forzas de seguridade, este martes pedirán ao xuíz autorización para rastrexar tanto a posición do seu teléfono móbil como posibles gastos, transferencias e outros movementos que puido facer na súa conta bancaria.
Así, mantéñense “abertas todas as hipóteses” para dar con el, tamén a súa marcha voluntaria. A procura esténdese non só á zona na que foi cear o venres, senón por todo o municipio. No operativo participan tamén axentes do corpo local e da Garda Civil.
CONDUCE UN FORD FIESTA GRIS
No momento da súa desaparición, vestía pantalón vaquero e unha camisa azul de cadros, e viaxaba nun Ford Fiesta de cor gris. De acordo con información de SOS Desaparecidos, Alejandro mide 1,83 e é de complexión “grosa” con pelo moreno, ollos castaños e pendentes nas orellas.
