EFE. Dous homes sentaranse este xoves -día 6 de febreiro- no banquiño dos acusados da Audiencia Provincial de Lugo para responder por un suposto delito de estafa, dado que van ser xulgados por enganar a un matrimonio de avanzada idade para quedarse cun solar da súa propiedade, situado na zona de Covas, en Viveiro.

Segundo o escrito de acusación, a venda do solar -valorado en 150.000 euros- pechouse a cambio da entrega por parte dos compradores de “dous apartamentos, dous trasteiros e dúas prazas de garaxe” no edificio que supostamente ían construír no terreo adquirido.

Na escritura “facíase constar”, precisa o fiscal, que “o prazo para a entrega dos inmobles sería un máximo de 30 meses desde a obtención da preceptiva licenza municipal de obra nova”.

Con todo, o ministerio público entende que “realmente no ánimo dos acusados nunca estivo realizar edificación algunha no solar en cuestión, feito que loxicamente ocultaron aos vendedores” para facerse igualmente coa parcela.

“Así, ningún dos dous realizou acto algún tendente á iniciación dunhas obras, como fose elaborar un proxecto de edificación ou solicitar unha licenza“.

Por iso, o fiscal acúsaos a ambos dun delito de estafa, pide para eles unha pena de dous anos e medio de cárcere e o pago dunha indemnización de 150.000 euros ás dúas herdeiras do matrimonio propietario do solar.