Ramón González Rey/axencias. Unha muller resultou ferida na mañá deste mércores logo de tirarse ao mar xunto á lonxa nova de Celeiro, no municipio lucense de Viveiro. A muller foi rescatada en lancha e trasladada ao Hospital Público da Mariña, onde se atopa en bo estado.
Segundo informou o Centro Integrado de Atención ás Emerxencias (CIAE) do 112 Galicia, foi unha persoa particular quen advertiu do ocorrido, sobre as 11.40 horas. Trala alerta, púxose a situación en coñecemento de Salvamento Marítimo, de Urxencias Sanitarias de Galicia-061, do servizo municipal de Protección Civil, dos Bombeiros de Viveiro e da Policía Nacional e Local.
Unha vez foi rescatada, esta persoa foi trasladada nunha ambulancia ao hospital. Actualmente atópase en bo estado de saúde, segundo precisaron fontes oficiais. A propia muller auxiliada, precisan as mesmas fontes, asegurou que non se tratou dunha caída senón que se tratou dunha tentativa de suicidio.