EFE. Un home de 51 anos de idade, con iniciais J. M. P. G., resultou ferido a primeira hora desta mañá nun aparatoso accidente de circulación que se produciu no municipio lucense de Cervo.

Segundo informaron fontes do Centro Integrado de Atención ás Emerxencias (CIAE) do 112 Galicia, o sinistro produciuse ás 7.36 horas na baixada do Castelo, nas inmediacións da entrada principal ao complexo industrial de Alcoa.

O 112 recibiu aviso da colisión entre dous vehículos e mobilizou ao 061, Garda Civil de Tráfico, Grupo de Emerxencias Supramunicipal (GES) de Cervo e Bombeiros de Viveiro, así como ao persoal de mantemento da vía.

Tras recibir os primeiros auxilios no mesmo lugar do accidente, o único ferido foi trasladado nunha ambulancia de soporte vital básico ao Hospital da Mariña.