A Policía Nacional de Viveiro confirmou que oito mulleres presentaron denuncia contra os vídeos de cámara oculta gravados durante a Maruxaina, nos que ducias de mozas foron capturadas mentres ouriñaban na rúa e que foron subidos a webs pornográficas.

Estas denuncias súmanse ás presentadas en Burela ante a Garda Civil, que é a encargada da investigación. Polo de agora non trascendeu o número de denuncias presentadas ante a oficina do Instituto Armado. Estímase que as afectadas polos vídeos poderían rondar as 80.

Por agora a investigación céntrase na hipótese dunha gravación planificada e premeditada, xa que foron colocadas varias cámaras capaces de filmar distintos ángulos e mesmo identificar ás vítimas, resultando vídeos cunha metraxe de longa duración.

As denuncias foron enviadas ao Xulgado xuntos cos vídeos e fotografías en soporte dixital que as propias rapazas obtiveron, xa que as gravacións ilegais foron retiradas das páxinas. Segundo confirmou o propio corpo policial, non consta ningunha denuncia por rapazas afectadas menores de idade, unha posibilidade da que advertían algunhas asociacións.

Tanto o Concello de Cervo como a Asociación de Mulleres en Igualdade de Burela (Bumei) persoaranse como acusación particular e popular, mentres que os feitos foron rexeitados por colectivos como o Observatorio da Mariña pola Igualdade ou institucións como a Deputación de Lugo.