A Garda Civil tivo coñecemento o pasado día 11 de agosto dun accidente de circulación no centro urbano da localidade de Lourenzá, na Mariña Lucense, ás 20.10 horas. Un dos vehículos implicados, un turismo de cor azul, deuse á fuga.

Acudida a patrulla no lugar e auxiliado o outro condutor, os axentes iniciaron as xestións oportunas para localizar ao vehículo e condutor fuxido, conseguindo pescudar a identidade do titular do turismo e localizando ao mesmo nun establecemento de hostalería situado en Lourenzá, coincidindo tanto a vestimenta como a descrición física do condutor fuxido coas do titular.

Tratábase dun mozo de 26 anos veciño de Trabada que en todo momento negou ser quen conducía o turismo, asegurando que lle roubaran o coche e que descoñecía o paradoiro do mesmo, pero que aínda non denunciara o roubo ante as autoridades competentes.

Tralas varias incongruencias e respostas erráticas do titular do vehículo implicado no accidente, sospéitase que fuxiu do lugar debido a que devandito turismo carecía tanto do seguro obrigatorio como da inspección técnica de vehículos en vigor. Polo anterior decídese crear unha liña de investigación ao redor da persoa do titular do turismo, quen ademais posúe antecedentes policiais por varias infraccións en tema de seguridade viaria.

O xoves día 13 de agosto, sobre as 21.00 horas, localizouse nunha zona boscosa de difícil acceso próxima a Lourenzá un vehículo completamente calcinado, cuxa carrocería e número de bastidor coincide co turismo implicado no accidente e que posteriormente se deu á fuga, pero que aínda non se interpuxo denuncia polo suposto roubo que afirmaba o seu titular sufrir facía xa dous días.

O venres 14 de agosto, o propietario do vehículo compareceu en dependencias da Garda Civil coa intención de presentar denuncia polo roubo do vehículo sendo informado nese momento, que o vehículo fora localizado o día anterior, totalmente calcinado, e que tras a pertinente inspección ocular, despréndese que o lume foi claramente intencionado. Segundo os axentes, a pesar de que a persoa incendiaria pretendeu borrar calquera proba ou vestixio, observouse como a chave do coche atopábase introducida no bombín do contacto, e que o turismo presentaba danos na aleta dianteira dereita, correspondendo co accidente no que se viu implicado, ademais de tentar deixar ilexible o número de bastidor.

Tralo anterior, comunícaselle que existen indicios suficientes para considerar que el é o condutor implicado no accidente e que a súa intención podería implicar a comisión dun delito por denuncia falsa, polo que o titular e propietario do vehículo manifesta nese momento ser o condutor no momento do accidente, que fuxiu do lugar por carecer de seguro e ITV, e que tras o sinistro ocultou o vehículo nunha zona apartada, para o día seguinte, de noite e antes da madrugada saír do seu domicilio cunha garrafa de gasolina e prenderlle lume ao coche, coa clara intención de que non puidese relacionárselle co devandito accidente. Instrúense un total de seis infraccións administrativas en materia de seguridade viaria e lexislación medioambiental polo abandono de verteduras incontroladas de residuos perigosos.