Unha colisión entre dous vehículos na rúa Pardo Bazán de Burela saldouse cunha persoa ferida, que foi evacuada en ambulancia ao Hospital Público da Mariña tras envorcar a furgoneta que conducía.

Segundo concretaron fontes do Centro Integrado de Atención ás Emerxencias (CIAE) do 112 Galicia, o incidente produciuse sobre as 15.55 horas deste martes, cando un coche e unha furgoneta colisionaron.

Segundo as primeiras informacións unha persoa quedara atrapada na furgoneta, que envorcou polo impacto, pero posteriormente confirmouse que saíra do vehículo sen necesidade de excarceración, anulando a petición realizada aos Bombeiros de Barreiros.

Deuse aviso a Protección Civil, Policía Local, o Grupo de Emerxencias Supramunicipal (GES) de Cervo e 061-Urxencias Sanitarias. A persoa ferida foi evacuada ao centro hospitalario de Burela, sen que por agora trascendesen máis novas sobre o seu estado de saúde.