A Garda Civil detivo na localidade de Foz, na Mariña Lucense, a un veciño desta mesma localidade de 55 anos de idade como suposto autor dun delito de lesións por agresión e ameazas de morte con arma branca. Así o concretou este martes o Instituto Armado a través dun comunicado remitido aos medios de comunicación.
Segundo precisa a Benemérita na mesma nota de prensa, a persoa detida foi xa posta a disposición xudicial.
APUÑALAMENTO EN SARRIA
Namentres, a Garda Civil segue buscando a un home que onte apuñalou a outro en pleno centro de Sarria, na Praza da Vila.
Este suceso produciuse sobre as 21.00 horas, segundo informaron fontes da Benemérita, cando un particular avisou ás forzas da orde de que un home estaba ferido e sangrando na céntrica praza, o que motivou que varios axentes da Garda Civil e da Policía Local se presentasen no lugar dos feitos.
O ferido, un home de 33 anos, presentaba unha ferida por arma branca na rexión torácica, polo que foi evacuado ao HULA.
