O helicóptero da Xunta de Galicia ‘Pesca 2‘ rescatou na madrugada deste luns aos tres tripulantes do pesqueiro ‘Sapilo‘, de Burela, tras afundirse fronte á costa de Foz despois de sufrir unha vía de auga.
Segundo a información facilitada por Salvamento Marítimo, ás 4.26 horas deste luns recibiuse o aviso do ‘Sapilo’, con porto basee en Burela, de que sufrira unha vía de auga tras varar nunha zona de rocas fronte á praia de Llas.
Tras a chamada de emerxencia, o Centro de Salvamento de Fisterra coordinou o dispositivo de rescate, que efectuou o helicóptero ‘Pesca 2’ do Servizo de Gardacostas da Xunta. Os tres tripulantes foron rescatados sans e salvos e foron evacuados ata o Porto de Celeiro, desde onde a Garda Civil trasladounos ao seu porto base.
Ás 5.43 horas a ‘Pesca 2’ estaba de regreso co tres tripulantes recatados, que se atopaban “todos ben” e non necesitaban asistencia médica, confirmaron as mesmas fontes. No marco deste operativo foron mobilizadas, ademais, as embarcacións ‘Salvamar Alioth‘ de Salvamento e a ‘LS Saturno‘ de Cruz Vermella para controlar posibles fugas de combustible e recoller restos do naufraxio.
