EFE. A Garda Civil, no marco da operación Arual, detivo na localidade lucense de Ribadeo a un mozo de 19 anos, veciño dese municipio, por cultivar marihuana para vender no seu propio domicilio.

Segundo informou o Instituto Armado a través dun comunicado, o mozo foi denunciado o pasado mes de xullo por cultivar marihuana na súa casa, dado que as plantas “eran visibles desde o exterior do seu domicilio”.

A Benemérita puxo en marcha un operativo de vixilancia e os axentes que participaron no mesmo constataron “unha numerosa afluencia de potenciais clientes“, que acudían ás inmediacións do domicilio e, desde alí, púñanse en contacto co sospeitoso.

Tras un breve encontro con el, os gardas interviñéronlles aos supostos compradores a sustancia que lles entregou.

INTERVIDOS 79 GRAMOS DE CANNABIS E 1.165 EUROS

Posteriormente, realizouse un rexistro no domicilio do sospeitoso, onde foron intervidos 79 gramos de marihuana preparados para a súa venda, así como 1.165 euros en billetes de diferentes valores, supostamente procedentes da venda de droga.

O mozo foi imputado como investigado por un delito contra a saúde pública e posto a disposición xudicial.