A sección segunda da Audiencia Provincial de Lugo absolveu ao presidente e ao secretario dunha sociedade láctea de Riotorto dos delitos societarios e de administración desleal dos que foron acusados.

O tribunal considera que a proba practicada non acredita que os sospeitosos cometesen os delitos que lles imputaban. Os denunciados negaron os feitos denunciados e, algunhas das súas afirmacións, segundo destacan os maxistrados, foron corroboradas pola documental achegada. Ademais, os xuíces indican que no informe do perito xudicial non hai datos que proben que os acusados “dispuxesen de cartos procedentes da sociedade para beneficio propio“, á vez que destacan que unha sentenza condenatoria “non pode ampararse en meras sospeitas dos denunciantes”.

A acusación particular mantiña que ambos falsearan facturas para xustificar sustraccións de diñeiro, prexudicando gravemente á sociedade, impedindo aos demais socios coñecer “o estado real da mesma”, así como de “perpetuarse nos postos” directivos, como presidente e secretario da sociedade “manter o dominio” da mesma.

Pedía para cada un deles dous anos de cárcere, multa e a responsabilidade civil correspondente por un delito de administración desleal, ao considerar que prexudicaran á sociedade “en beneficio propio e con ánimo de enriquecerse inxustamente”.