Dous xabarís entraron a primeira hora da noite do martes nun ultramarinos de Burela, situado na Avenida de Arcadio Pardiñas.

Os animais asustáronse da presenza do dependente e saíron da tenda sen causar danos. Un coche que percibiu a súa presenza tentou espantalos para que marchasen do centro urbano da vila burelá, mentres os curiosos gravaban a escena en vídeo. “É o que me faltaba, ter estes novos clientes”, ironizou o mozo que atendía o negocio.

O suceso prodúcese apenas dez días despois de que se gravasen porcos bravos en pleno centro da Coruña, na rúa Juan Flórez. Asociacións animalistas aseguraron que o toque de queda favorece a súa presenza nas vilas, ao non atopar estímulos que os espanten. Por iso pediron que se trate de disuadilos con métodos non letais.