O falso médico ferrolán José Manuel López Pérez, coñecido como “Coté”, que tivo consultas en Ferrol e Viveiro, aceptou seis anos de cárcere declarándose culpable dos delitos de intrusismo, lesións, falsificación e estafa na vista celebrada na Audiencia Provincial da Coruña. O acordo de conformidade entre as partes descarta así a pena de 338 anos que pedía a Fiscalía, posto que non responderá polo delito de homicidio por imprudencia do que foi acusado.
As indemnizacións alcanzarían, segundo o pacto entre as acusacións e a defensa, os 3,3 millóns de euros para o cento de vítimas personadas no caso. Segundo explicou o fiscal, no acordo contémplase atenuante “moi cualificada” de dilacións indebidas.
A súa muller, acusada de branqueo de capitais e para a que o fiscal pedía tres anos de cárcere, ve reducida a pena a un ano de prisión, por cómplice de estafa, co acordo ao que chegaron as partes.
