A Policía Nacional de Viveiro informou de que, grazas á colaboración cidadá, conseguiu esclarecer “varios delitos contra o patrimonio ocorridos nas últimas semanas no interior dun garaxe comunitario, así como nos arredores do mesmo”. O presunto autor dos roubos foi detido por mor da participación veciñal.

Tras recibir varias denuncias pola subtracción de pezas mecánicas de varios vehículos, o casco dunha moto, así como dun arrancador de baterías -este último subtraído dun vehículo que se atopaba no exterior, pero próximo ao devandito garaxe-, iniciouse unha investigación dos feitos. O grupo operativo local da Comisaría conseguiu así identificar un mozo como presunto autor, procedendo á súa detención e á súa posta a disposición xudicial.

A Policía Nacional remarca que ten “como principal canle de comunicación cos cidadáns a figura do delegado de participación cidadá existente en cada Comisaría, o cal establecerá contactos periódicos con todos os colectivos, canalizará as informacións, suxerencias e propostas ofrecidas por estes e trasladaraos ás unidades policiais correspondentes para dar solución aos problemas expostos, realizando un seguimento de todas as actuacións e informando do resultado”. Así, convida a participar ben nas dependencias policiais ben no correo electrónico participa@policia.es.