Os veciños dun edificio de Burela que foron desaloxados esta noite por un incendio orixinado por unha tixola ao lume, regresaron aos seus fogares, segundo confirmou o alcalde, Alfredo Llano, tras os feitos.

O lume orixinouse no número cinco da rúa Manuel Murguía, en concreto no terceiro piso, despois de que ardese unha tixola sobre as 22,00 horas do luns. Despois de traballar varias horas no lugar, os bombeiros lograron sufocar o lume.

O alcalde de Burela confirmou que a orixe das chamas se debeu a un “descoido”, ao deixar a tixola ao lume. “Menos mal que se atendeu ben, aínda que a cociña quedou desfeita, pero cortouse pola inmediata intervención dos bombeiros e dos servizos de emerxencia”, apuntou.

Ao fío deste suceso, o rexedor chamou a atención sobre a necesidade de “ter coidado cando se está cociñando porque é moi fácil que poida ocorrer unha desgraza” como o “accidente doméstico”, apuntou, neste inmoble.

Tamén confirmou que, despois de desaloxar a totalidade deledificio, xa volveron ás súas casas os veciños que resultaron afectados. “Agora teñen que valorar danos”, apuntou o alcalde, que valorou o que non houbese danos persoais.