Os servizos sanitarios evacuaron na noite deste pasado xoves ao Hospital de Burela a un home que sufriu unha caída mentres traballaba co seu tractor no municipio de Mondoñedo.

Segundo informou o 112 Galicia, os feitos tiveron lugar poucos minutos antes das 22,00 horas do xoves nunha leira particular no lugar de O Arco, na parroquia de Masma.Os Bombeiros de Barreiros indicaron ao 112 Galicia que o home caera cando trataba de atar unha carga ao remolque do tractor e levou un forte golpe na cabeza.

Foi unha persoa particular quen chamou ao Centro Integrado de Atención ás Emerxencias para pedir axuda. Así, ademais de Urxencias Sanitarias de Galicia-061 e dos membros do Servizo de Prevención Extinción de Incendios e Salvamento, os xestores do 112 pasaron aviso á Garda Civil, Policía Local e tamén aos efectivos de Protección Civil da localidade.