O comité de empresa de Alcoa San Cibrao proporá mobilizacións aos traballadores

Os sindicatos toman a decisión ante "a pasividade manifesta das administracións" nun momento "crítico para o futuro da Mariña Lucense"

Manifestación da industria electrointensiva en Santiago. EFE/LAVANDEIRA JR.

O comité de empresa de Alcoa San Cibrao proporá un calendario de mobilizacións aos traballadores ante a “pasividade manifesta” das administracións nun momento “crítico para o futuro da Mariña Lucense“.

Ao longo dos últimos meses, mentres vendía as súas factorías de Avilés e A Coruña ao fondo suízo Parter, a multinacional norteamericana puxo en cuestión a fábrica de aluminio primario, a única de Españaque ve “inviable” sen un abaratamento da electricidade e na que aplicou un recorte produtivo do 11%, co peche de 32 cubas das 512 que ten o departamento de electrolise.

Os sindicatos acordarán a data para convocar a xuntanza co persoal nun pleno que celebrarán o vindeiro mércores 4 de setembro.

SEN DATA PARA A REUNIÓN COA MINISTRA DE INDUSTRIA

As centrais critican que o ministerio de Industria non lles concretase unha data para a reunión coa ministra, Reyes Maroto.

“Pese a que en conversacións telefónicas, o xefe do seu gabinete nos manifestou, xa fai máis de dez días, a intención de visitar a factoría durante a primeira quincena de setembro, a día de hoxe seguimos sen confirmación da mesma nin concreción da data”, explican os sindicatos.

SEN RESPOSTA DO PRESIDENTE DA XUNTA

Tamén se queixan da “non ter recibido contestación algunha” por parte de Xunta de Galicia tras solicitar unha entrevista co presidente Alberto Núñez Feijóo o pasado mércores 23 de agosto.

RESPOSTAR

Please enter your comment!
Please enter your name here