A multinacional Alcoa convocou o vindeiro venres (13.00 horas) a segunda reunión da mesa multilateral para fiscalizar o proceso de venda da planta de aluminio de San Cibrao. Comité de empresa do complexo industrial, sindicatos, Xunta de Galicia e Goberno central entrevistaranse coa titular das instalacións para coñecer a situación actual dentro das negociacións co potencial comprador, Liberty House.

A falta dun mes para que venza o prazo estipulado para concretar un preacordo de venda -a data límite é o 27 de setembro-, Alcoa explicará á parte social e ás Administracións como foron as dúas primeiras semanas de conversas, nas que propietaria e investidor abordaron cuestións macroeconómicas sobre as instalacións.

A partir da vindeira semana que vén realizarase unha ‘due diligence’ coa que se afondará nos detalles máis concretos dunha posible venda, avaliando Liberty House ‘in situ’ o estado da fábrica e os investimentos que precisará para asumir a produción. Os directivos da siderúrxica británica visitarán nos vindeiros días a planta.

Os obreiros reclamaron desde o banco de Loiba, enclave turístico do norte de Galicia, unha solución para o complexo industrial de Alcoa. De non chegarse a un acordo para a venda, titular e comité retomarían o 28 de setembro, cun só día de marxe, o período de consultas do Expediente de Regulación de Emprego (ERE) presentado pola propietaria na planta de aluminio, un despedimento colectivo que afectaría a 534 obreiros e a outros 400 na industria auxiliar. Os obreiros queren por todos os medios evitar a parada das cubas de electrólise, que suporía “a morte” desta industria na Mariña Lucense, aseguran.