O comité de empresa de Alcoa anunciou este venres na asemblea de traballadores que a titular da planta de aluminio está a valorar unha contraoferta formulada a última hora do pasado xoves por parte da potencial compradora da fábrica, Liberty House, polo que na mesa multilateral celebrada esta mañá non trascenderon máis novas sobre o futuro das instalacións. Fontes da propietaria non se pronunciaron sobre este punto, nin os empregados tiveron acceso ao contido da proposta da siderúrxica británica.
“Estamos nunha negociación nas que se están comezando a achegar as posturas“, aseverou o presidente do comité, José Antonio Zan, “e malia que cada un conta a súa versión a única saída que hai é a venda”. O sindicalista concretou que Liberty House cedeu nas súas pretensións de negociar tamén pola planta de alúmina, tratando agora de asegurar un contrato de longo prazo deste subministro.
INSTAN Á PROPIETARIA A “DEIXAR DE POÑER TRABAS”
O presidente do comité de empresa reprochou que Alcoa pretende establecer compromisos a “cinco anos” en España para a subministración de alúmina, cando en Noruega comprou dúas plantas “cun contrato a dez anos e con melloras na subministración alúmina en relación co prezo de mercado”. O representante do comité de empresa subliñou que “Liberty (que procura un acordo a 20 anos vista) ofrece pagar a prezo de mercado”, polo que “non ten lóxica” que non se poida expor ese contrato para a subministración de materia prima a dez anos se a titular “non ten pensado nin vender nin pechar a planta de alúmina en San Cibrao”, salvo que desexe “boicotear” a súa venda.
O DOMINGO, XUNTANZA EN VIVEIRO
De non concretarse unha venda antes do 28 de setembro, o acordo entre Alcoa e comité de empresa para prorrogar o período de consultas do Expediente de Regulación de Emprego (ERE) presentado en aluminio -que suporía a perda de máis de 900 postos de traballo entre a fábrica e a industria auxiliar-, contempla que sindicatos e multinacional retomarían as negociacións do despedimento colectivo ese mesmo día.
Os traballadores convocaron unha xuntanza familiar o vindeiro domingo na Praza Maior de Viveiro, de 11.30 a 12.00 horas, na que amosarán o seu apoio a unha venda repartindo cascos de Liberty House.
A XUNTA PIDE ÁS DÚAS PARTES QUE SUBSANEN AS CUESTIÓNS QUE DIFICULTAN A VENDA
Finalmente, o conselleiro de Economía, Emprego e Industria, Francisco Conde, reclamou a Alcoa –unha solicitude que fai extensiva a Liberty House– “que subsane as cuestións que dificultan o peche da operación de compra-venda da planta de San Cibrao”. Así o manifestou durante unha nova xuntanza da mesa multilateral onde apelou á necesidade de avanzar nas negociacións para acadar unha solución definitiva para a factoría da Mariña e os traballadores que dependen dela.
O conselleiro apelou ao diálogo e reiterou a importancia de que tanto Alcoa como a empresa Liberty House persistan na senda do acordo. Nesta liña, “é fundamental que o Goberno central non demore máis un prezo eléctrico que permita reducir os custos enerxéticos de factorías como a de Alcoa en San Cibrao”, afirmou. “A industria electrointensiva segue á espera do estatuto do consumidor electrointensivo; de que se autoricen as compensacións por custos indirectos de CO2 ata o máximo que permite a Unión Europea e de que se poña en marcha o novo mecanismo de xestión da demanda que substitúa a poxa por interrompibilidade“, insistiu.
Conde reiterou “todo o apoio” da Xunta de Galicia “para que a fábrica de San Cibrao poida contar cun plan de futuro que garanta a actividade e o emprego, a máxima prioridade da Administración autonómica”.
