A multinacional Alcoa gardou silencio este mércores sobre o auto do Tribunal Superior de Xustiza de Galicia (TSXG) que estima en parte as medidas cautelares solicitadas polos sindicatos, impedindo á empresa iniciar a parada das cubas de electrólise. Si permite o fallo á compañía estadounidense comezar a aplicar despedimentos previstos dentro do expediente de regulación de emprego (ERE) presentado en aluminio -que suporía 524 despedimentos na fábrica e outros 400 na industria auxiliar-, sempre e cando non afecten á mencionada maquinaria.
Fontes de Alcoa consultadas polo Xornal da Mariña afirmaron que a multinacional “acata” a decisión do alto tribunal galego, cuxo auto “está analizando“. Deste xeito, a empresa non se pronuncia sobre un posible recurso de reposición.
Alcoa tampouco concreta cal é a cantidade de traballadores que precisa, dos 524 obreiros ameazados, para manter as cubas activas, nin se prevé efectuar despedimentos nas próximas semanas. Segundo os sindicatos, “o 90% do persoal” sería necesario para que non parase a maquinaria.