InicioPolíticaVeiga pide ao BNG de Barreiros a concellería de asuntos sociais cunha...

Veiga pide ao BNG de Barreiros a concellería de asuntos sociais cunha dedicación exclusiva

Os nacionalistas afirman que "non hai ningunha porta pechada" e reivindican que a veciñanza "optou por un goberno distinto" ao darlles o maior número de votos

Publicada o

- Advertisement -

Bloque Nacionalista Galego (BNG) e PSdeG-PSOE comezaron este luns as negociacións para a formación de goberno en Barreiros, despois de que nas pasadas eleccións municipais se producise un empate a cinco edís entre o Partido Popular (PP) e a formación nacionalista, a lista máis votada, e os socialistas quedasen cunha única acta que pode ser chave para constituír o executivo municipal.

Na primeira toma de contacto, a candidata á alcaldía, Ana Ermida; a responsable local da organización, Belén Fernández; e os membros do consello local e da candidatura, Xoán Manuel Díaz e Suso Díaz, participaron pola banda do BNG.

Polos socialistas estiveron nas conversas a alcaldable, Carmen Veiga; a representante na organización provincial, Mari Iglesias; o secretario de política municipal, Miguel Veiga; e o membro da candidatura José Antonio Otero Ramos.

Na xuntanza, o Bloque plantexou ao PSOE que apoiase a investidura dun goberno nacionalista en solitario e Veiga pediu como condición para a formación dun goberno en coalición unha concellería de asuntos sociais con dedicación exclusiva.

“A solicitude débese a que considero que a política local é a que permite un contacto máis directo e de proximidade coa veciñanza, e se estou nela é para facer esa axenda social, para coidar das persoas e solventar os seus problemas diarios“, argumenta a candidata socialista, que xustifica a petición dunha dedicación a tempo completo en que “para iso hai que estar no goberno”.

A agrupación local do BNG valorará esta noite a proposta da alcaldable socialista, á que emprazou para unha nova xuntanza con data por concretar.

CERCANÍA A NIVEL DE PROGRAMA

“Nesta reunión trasladámoslles o noso programa, que foi o máis votado pola veciñanza”, expón Ermida, “de cara a ver a súa disposición para apoiar un goberno do BNG ou ben para facilitar un do PP“. Veiga descartou a posibilidade de respaldar unha investidura dun executivo nacionalista en solitario.

A candidata do Bloque afirma que “puidemos ver que a nivel programático as diferenzas non son excesivas“, un punto que Veiga confirma. “As necesidades de Barreiros creo que son evidentes e as vemos todos”, sostén a socialista.

Ermida afirma que “non está pechada ningunha porta” e móstrase disposta a buscar, nunha segunda xuntanza, “un punto en común que sirva para cumprir cos nosos compromisos e beneficiar á veciñanza, que é para o que estamos aquí”. ”

A xente apostou por outro goberno distinto desde o momento no que outorgou ao BNG ser a lista máis votada”, salientou.

REUNIÓN CO PP

Respecto da reunión mantida co candidato do PP e rexedor en funcións, Alfonso Fuente Parga, Veiga argumentou que ve lonxe chegar a un acordo.

Sinalou que a conversa “non foi nin parecida” á mantida este luns “nin se abordou ningunha oferta concreta” e sostivo que ten “a cabeza” centrada nas conversas cos nacionalistas, aos que, con todo, non vai ceder “un cheque en branco”.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...