O PSdeG-PSOE e o Bloque Nacionalista Galego (BNG) de Foz anunciaron que chegaron a un acordo para gobernar en coalición o municipio, despois de que nas pasadas eleccións municipais a lista socialista, liderada por Fran Cajoto, superou ao Partido Popular (PP) para converterse na máis votada, e na que a candidatura frontista, encabezada por Francisco Javier Fanego, gañou un edil para sumar tres.
O acordo acadado, segundo informaron os socialistas a través dun comunicado conxunto, “implica un equipo paritario, de consenso, de confianza, un único goberno que dea estabilidade a Foz e permita correxir os erros dos últimos anos”.
Cajoto agradeceu a “confianza” e “lealdade” dos nacionalistas, que chegaron a un acordo grazas a “programas complementarios que non entran en conflito”.
No mesmo texto, o BNG sinalou que o acordo acadado permítelle traballar “polos compromisos que adquiriu con todos os seu votantes”.
Os dous equipos aseguran que están “satisfeitos polo acordo acadado e moi ilusionados” coa nova etapa que se abre para os veciños de Foz. “O noso compromiso é con eles e única forma que coñecemos de traballar é en equipo”, conclúen.
REPARTO DE CONCELLERÍAS
O PSOE ostentará a alcaldía e a segunda tenencia de alcaldía, sendo responsabilidade do BNG a primeira tenencia de alcaldía, con competencias delegadas en medio ambiente, patrimonio, mar, deporte, xuventude, medio rural e coordinación en materia de normalización lingüística.
XUNTA DE GOBERNO
O BNG terá duas concellarías delegadas, correspondéndolle ao PSOE a representación nas outras catro que conformarán a xunta de goberno.
