O PSdeG-PSOE e mailo BNG de Burela reuniranse o vindeiro mércores despois de que este martes se suspendera a reunión mantida polas dúas forzas políticas para a formación dun goberno de coalición no municipio.
Segundo fontes dos nacionalistas, a xuntanza adiouse a mañá deste mércores para que as dúas formacións poidesen consultar unha cuestión técnica que suscita dúbidas sobre a súa cabida dentro da normativa.
A xuntanza entre socialistas e nacionalistas, que se celebrará a nove días da data estipulada para o pleno de organización, no que se deben establecer as áreas de goberno, será ás 12.30 horas.
As dedicacións do futuro executivo e a contía das retribucións, así como a presenza en órganos como a Xunta de Goberno parecen ser os principais atrancos para o entendemento entre as dúas formacións. Desde o grupo socialista asegurouse mesmo que había un acordo no reparto de áreas de goberno, o que o BNG nega.
Nos últimos días, PSOE e BNG intercambiaron reproches. Os nacionalistas afearon aos socialistas que non houbese unha reunión formal desde a investidura do alcalde, Alfredo Llano, o pasado 7 de decembro, e esixen maior peso no goberno local, descartando un apoio programático, instando a “interpretar os resultados electorais”, que deron un edil máis á formación frontista, mentres que o partido socialista perdeu un concelleiro e a maioría absoluta.
Desde o PSOE negan “pasividade” á hora de retomar as negociacións iniciadas antes da investidura e insisten en que a socialista é a lista con maior representación, reclamando que se manteña a porta aberta a un acordo programático que lles permita, se non se concreta o executivo de coalición, gobernar en solitario.