O Bloque Nacionalista Galego (BNG) denuncia a falta de socorristas en Burela, un problema que atribúe “ao nulo interese do Concello” en “mellorar o servizo”.
Segundo expón o voceiro do partido frontista, Mario Pillado, o pasado 31 de xullo “un dos profesionais que traballaban nos areais burelaos causou baixa definitiva“, sen que polo de agora o executivo local acadase unha contratación alternativa.
A formación frontista sinala que o Concello non foi capaz de cubrir ningunha das dúas prazas convocadas a través do Plan Único da Deputación de Lugo, “e polo que se ve non ten previsto suplir a baixa que se vén de producir, sabendo que hai profesionais con integrarse no servizo”. Pillado lembrou que no anterior proceso de selección o executivo municipal descartou un socorrista por presentar a súa solicitude fóra de prazo.
O voceiro da formación frontista indica que a carencia de profesionais “reflíctese no servizo, posto que non se van poder cubrir todas as quendas. En concreto, a praia de Ril queda parcialmente descuberta, un feito do que xa nos están a informar os veciños”, sostén Pillado, que agrega que “a xestión neste ámbito é desastrosa”.
“XESTIÓN DESASTROSA”
O BNG insta ao executivo local a cumprir as súas obrigas malia que goberna en funcións, dado que está pendente a repetición das eleccións municipais nunha mesa do Perdouro por unha reclamación de Burela Sempre. “Non sabemos se pensan que están de vacacións ata que se produza esa repetición electoral, pero a realidade é que deben garantir os servizos polo ben da veciñanza”, remata.
