O número de casos activos de coronavirus na provincia de Lugo ascende a 759, 26 máis ca onte, segundo o reconto ofrecido este martes polo Servizo Galego de Saúde (Sergas). Son 36 positivos novos nas últimas 24 horas, período no que se deron dez altas.
O número de ingresados continúa en aumento, con 35 -tres máis ca onte-; 34 deles permanecen no HULA, catro deles na Uci (un máis có pasado luns); o outro paciente hospitalizado está nunha planta do Hospital Público da Mariña. Un total de 724 doentes son atendidos en domicilio.
NOVA MORTE NO HULA, DUNHA MULLER DE 96 ANOS
No histórico da provincia documéntanse 38 falecementos, seis deles na Mariña, ademais dunha sétima vítima mortal, un varón que pereceu na Uci de Burela tras ingresar por Covid-19 e superar a doenza no seu período na unidade de críticos. A última persoa falecida, nas últimas 24 horas, foi unha muller de 96 anos, que estaba ingresada no HULA e presentaba patoloxías previas.
Déronse 1.366 altas, e o número de casos acumulados ascende a 2.163.
RESIDENCIAS
No tocante ás residencias, a incidencia da Covid-19 nos xeriátricos da provincia de Lugo é a seguinte:
Usuarios
89 Residencia O Incio (O Incio)
39 Residencia DomusVi Lugo
Traballadores
1 Residencia DomusVi Monforte (Monforte de Lemos)
27 Residencia O Incio (O Incio)
5 Residencia Domusvi Lugo (Outeiro de Rei)
1 Residencia de Maiores San Bartolomeu (Xove)
644 FALECIDOS EN GALICIA E 102 CASOS MÁIS
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 3.742 deles 1.403 son da área da Coruña, 759 da de Lugo, 343 da de Ourense, 233 da de Pontevedra, 253 da área de Vigo, 607 da de Santiago, e 144 da de Ferrol.
Do total de pacientes positivos, 17 están en UCI, 143 en unidades de hospitalización e 3.582 no domicilio. Polo de agora, en Galicia hai un total de 12.771 persoas curadas, rexistrándose 644 falecementos.O número de PCR realizadas é de 339.206.