Un incendio forestal na parroquia de Ove, preto de Santa Cruz e nunha área ubicada ao pé da estrada de Vilela, quedou controlado despois de calcinar 1,19 hectáreas de monte e obrigar a cortar a vía LU-5207 durante máis de dúas horas.
O incendio orixinouse sobre as 15.03 horas e o vento complicou as tarefas de extinción, que contaron coa participación dos Bombeiros de Barreiros, con dous axentes, catro brigadas e tres motobombas da Consellería de Medio Rural, ademais da Garda Civil e de Protección Civil. O lume quedou controlado sobre as 17.22 horas.
Sobre as 18.00 horas, a Policía Local reabriu a estrada ao tráfico, unha vez o lume estaba controlado e mesmo practicamente extinto.
INVESTIGACIÓN DA GARDA CIVIL
A Garda Civil investiga o suceso, aínda que fontes oficiais aseguran que por agora todo apunta a que se trata dun lume intencionado.
No pasado mes de febreiro, logo dun conato de incendio nesta mesma parroquia, o alcalde de Ribadeo, Fernando Suárez Barcia, lamentaba que a fegresía de Ove padeceu nos últimos anos arredor de 30 lumes, “máis que A Mariña Lucense xunta”. Neste caso, as lapas orixináronse nunha zona distinta que noutras ocasións, entre a N-640 e a ría.
