O Concello de Mondoñedo vén de convocar a cuarta edición do concurso de decoración de balcóns e fachadas Florea o teu balcón, que por primeira vez este ano convida a ornamentar as casas nas parroquias do rural.

O prazo para participar está aberto ata o 31 de xullo. As inscricións poden facerse a través do correo concursodebalcones@gmail.com ou na oficina de atención ao público do consistorio.

ELEMENTOS A VALORAR

A finais de agosto, os integrantes do xurado -que presidirá a técnica de turismo Claudia del Pino– realizarán visitas periódicas nas que valorarán, entre outros aspectos, a orixinalidade na ornamentación, a variedade, calidade e cantidade de flores ou o adecentamento da fachada e o resultado global.

Tamén se terá en conta o enxeño ou capacidade para acadar unha decoración óptima en vivendas que carezan de balcóns ou que, a priori, non reúnan as mellores condicións para participar no certame.

SEIS PREMIOS

O certame establece categorías: casco urbano, onde se repartirán catro premios, e zona rural, onde se entregarán dous. En suma, 600 euros.

O resultado do concurso darase a coñecer durante a primeira semana do mes de setembro.