O Servizo Galego de Saúde (Sergas) asegurou este xoves que cubriu a praza da traballadora social do Hospital Público da Mariña, despois de que o posto estivese vacante desde o pasado 1 de xullo, o que motivou as críticas da Confederación Intersindical Galega (CIG) e do Colexio Oficial de Traballo Social de Galicia (COTSG).
O COTSG anunciou este mesmo xoves o envío dun documento á dirección xeral de recursos humanos do Sergas no que reclama a cobertura da praza de traballo social no Hospital da Costa “durante os períodos vacacionais e os permisos”.
A xunta de goberno do COTSG alerta de que a inactividade da praza, que presta atención a persoas en situación de abandono nos hospitais ou en desprotección, ten “unha repercursión negativa na resolución das problemáticas sociais que presentan as persoas usuarias de dito hospital, o que provoca un incremento no gasto sanitario debido ás demoras en altas con problemática social”.
A entidade sostén que se deu un “menoscabo innegable na calidade do servizo prestado e un agravio comparativo entre áreas sanitarias”. As consecuencias da non cobertura da praza van “en detrimento considerable dos dereitos e intereses da poboación, pois afecta á súa vida diaria”.
Desde o COTSG subliñan a “importancia” de que a área sociosanitaria estea ben vertebrada nun país cunhas condicións demográficas particulares como Galicia. “Dita vertebración e coordinación non pode entenderse sen a figura da ou do traballador social”, engaden.
Por todo isto, desde a entidade solicítanlle ao Sergas a “cobertura inmediata da praza” en períodos vacacionais ou permisos, “cumprindo coa normativa vixente e garantindo o dereito a unha asistencia integral e de calidade”.
“EN FUNCIÓN DAS NECESIDADES”
Fontes do Sergas sosteñen que a traballadora social “está a ser susbtituída cunha nova persoa contratada”, e a argumentan que ademais esta profesional “conta co apoio doutras estruturas do Sergas, que ten máis traballadores sociais en centros de saúde como os de Ribadeo, Viveiro e Burela”.
Así, as mesmas fontes argumentan que a substitución do persoal se realiza “en función das necesidades“.
