O Concello de Barreiros recomenda non bañarse na praia de Arealonga tras detectarse contaminación microbiolóxica na auga.

O consistorio dispuxo carteis informativos para advertir da situación aos usuarios despois de recibir este venres unha comunicación do Sergas que daba conta dun índice de enterococos intestinais (escherichia coli) por riba do aconsellable.  A situación manterase á espera dunha nova analítica da auga a vindeira semana.

O goberno municipal explicou que os problemas de saneamento das parroquias de San Miguel e Reinante están na orixe das verteduras ao areal.

“Por esta razón, entre outras, é urxente acometer as obras necesarias para a construción dunha nova depuradora en San Miguel”, argumentou a alcaldesa Ana Ermida, que este mércores lle reclamaba á Xunta implicación para levar a cabo o proxecto, valorado en 3,3 millóns de euros por Augas de Galicia.

RESPOSTA Á XUNTA

A nacionalista tamén respondeu ás declaracións do delegado da Xunta en Lugo, José Manuel Balseiro, que este venres eludía a responsabilidade e indicaba que o saneamento é “competencia exclusiva dos Concellos”.

“A administración autonómica ten asumido noutros lugares obras similares e, mesmo en Barreiros, existiu hai un tempo un compromiso para aportar unha importante suma de diñeiro a un convenio para a mellora e ampliación das infraestruturas de saneamento entre as que se atopaba esta mesma depuradora”, indicou Ermida.

A rexedora manifestou “a disposición do Concello a buscar a colaboración entre administracións en beneficio das veciñas e veciños e fuxir de sectarismos que, concluíu, “non levan a solución algunha”.