A Confederación Hidrográfica do Cantábrico (CHC) fixo públicos este xoves os primeiros resultados das mostras tomadas trala vertedura de xurro que afectou ao Eo, segundo as cales a contaminación diminúe río abaixo e na ría de Abres a auga cumpre cos valores de referencia.
O CHC precisa nun comunicado que “as mostras realizadas os pasados días 26 e 27 confirman a contaminación orgánica e de tipo fecal” nos tres quilómetros do Ouria afectados e mais nos dous primeiros quilómetros do Eo trala confluencia co afluente, ata a Ría de Abres.
Nese punto, no límite entre os municipios de Vegadeo e Trabada, os resultados “cumpren cos valores de referencia que establece o Reglamento do Dominio Público Hidráulico“. “Apreciase unha notable redución da contaminación respecto dos puntos situados augas arriba”, engade a nota, que tamén destaca a boa evolución das mostras dun día para outro.
TRES NOVAS BARREIRAS ANTICONTAMINACIÓN
O organismo hidráulico informa ademais de que “se instalarán tres novas barreiras de protección no río Ouria”, que se suman as seis instaladas na confluencia entre o rego e mailo Eo, en Abres.
A CHC di tamén que iniciou “a limpeza dos residuos acumulados nos lados do cauce do Ouria, principalmente na zona alta”.
Ademais, coordina a retirada dos residuos que quedaron na ladeira pola que escorreu o xurro, onde as tarefas de limpeza comezaron este mércores.
REAPERTURA DA PRODUCIÓN NA RÍA DE RIBADEO
Este mesmo xoves, a Dirección Xeral de Pesca Marítima do Principado de Asturias decretou a reapertura da zona de produción da ría de Ribadeo para todas as especies explotables.
Segundo expón o Goberno asturiano nun comunicado, decide a reapertura “tras verificar que as condicións sanitarias das que goza a zona non se viron afectadas pola vertedura”.
O Principado explica que decretou o peche cautelar da zona “mentres o laboratorio de Saúde Pública realizaba as análises” correspondentes, unhas probas que “ratifican que se mantiveron os niveis previos de produción de bivalvos da ría”.
