A Deputación Provincial de Lugo apoia con 5.500 euros o Mercado Medieval de Alfoz, que agarda a 4.000 persoas na vindeira fin de semana no Castrodouro.
A deputada de cultura, Pilar García Porto, o alcalde alfocense, Jorge Val, e o concelleiro de desenvolvemento local do municipio, Xabier Pardiñas, presentaron no Pazo de San Marcos a vixésima edición do evento.
Porto explicou que o evento “ten interese histórico pola posta en valor que se fai da figura do Mariscal Pardo de Cela, pero por riba disto, este mercado é un grande revulsivo económico para o concello, xa que durante unha fin de semana duplicará a súa poboación coa chegada dos visitantes ao municipio”.
Val, pola súa banda, destacou que o mercado está “feito co cariño dos veciños” e serve para dar a coñecer o noso municipio e un ben cultural e histórico tan importante como é a fortaleza do Castrodouro“.
PROGRAMA
Podes consultar o programa da cita, que está composto de ata vinte actividades, incluíndo teatro, gastronomía ou xogos, aquí.
