EFE. O comité de Alcoa espera reunir traballadores de electrointensivas de toda Galicia na manifestación programada para o día 26 de febreiro en Lugo, que partirá da estación de autobuses e rematará fronte á Deputación de Lugo. Os sindicatos continúan a preparar a protesta para reclamar unha solución para a planta de aluminio do complexo industrial de San Cibrao, que a multinacional ameaza con pechar se o Goberno non ofrece un abaratamento da enerxía eléctrica que sitúe os custos da luz cerca das cifras que manexan outros países europeos da contorna.
Ademais, os obreiros continuarán a semana que vén en Burela, nun día por concretar, a súa campaña con lazos de cor azul eléctrico para visibilizar a situación da factoría posta en cuestión por Alcoa. Tras colocar estes símbolos en Xove, San Cibrao (Cervo) e Viveiro, o seguinte municipio en cercanía á planta acollerá o acto reivindicato.
“Todos os comercios están colaborando. A resposta é unánime e estamos inundando de lazos azuis a comarca. A campaña está tendo moi boa aceptación por parte da cidadanía, porque a xente é consciente de que o está en xogo”, dixo o presidente do comité de empresa, José Antonio Zan (CC OO). “A colaboración está sendo unánime”, expuxo.
Presentadas as alegacións ao estatuto das electrointensivas, considerado insuficiente tanto polos sindicatos como pola empresa, e ao que alegaron tamén os Gobernos de Galicia, Asturias e Cantabria, o comité estará pendente da resolución das alegacións. En principio, non hai un prazo fixado para atender as solicitudes, pero agárdase que a principios de marzo o Executivo central poida amosar de novo o documento reformado.
A XUNTA SEGUE A PRESIONAR AO GOBERNO
Pola súa banda, o conselleiro de Economía, Emprego e Industria, Francisco Conde, esixiu ao Goberno central unha “resposta inmediata” ás peticións de reforma do borrador do estatuto elaborado para rebaixar o prezo da enerxía e evitar así “condenar ao peche” as plantas de empresas como Alcoa e Alu Ibérica.
“Non parece razoable que España renuncie á produción de aluminio primario cando outros países están establecendo medidas para garantir productividade e os empregos”, expón Conde.
