EFE. O presidente do comité de empresa de Alcoa San Cibrao, José Antonio Zan, lamentou que a multinacional “siga empeñada en parar as cubas, en parar o corazón da fábrica”, polo que volveu reclamar ao Goberno de España que defina de “unha vez” a súa postura en relación cunha posible intervención da factoría, na que a compañía presentou un Expediente de Regulación de Emprego (ERE) que suporía máis de 900 despedimentos entre a fábrica e as contratistas.
Respondía así ao comunicado da dirección de Alcoa no que a multinacional asegura que se abre a “explorar” aquelas “alternativas ou propostas que poidan suscitar” os representantes dos traballadores ou as autoridades, pero no que tamén aclara que para “valorar ou analizar” ditos ofrecementos, teñen que ser “concretos e realistas”, algo que “a día de hoxe aínda non ocorreu”. No texto, a compañía xustifica a súa decisión de non vender a planta de aluminio coas cubas acesas, ao argumentar que “non ten tempo” para afrontar un proceso de venda por mor das “perdas”.
“O que necesitamos é que antes do día 23 de xullo o Goberno se sitúe dunha vez e nos diga se nos vai apoiar ou vai deixar que Alcoa peche a fábrica”, dixo Zan.
Nese sentido, recordou que “a Xunta de Galicia di que apoia a intervención, ata que a apoiaría con préstamos participativos, que poñería capital, pero fai falta que o Goberno tome unha decisión e diga dunha vez que vai facer”.
APOSTA POLO “ALUMINIO VERDE”
Ao seu xuízo, chegou o momento de que diga se “quere fabricar aluminio en España ou non quere”, tamén “se quere que o aluminio español sexa o máis verde de todo o mundo”, porque “iso pódese conseguir mediante unha produción con enerxías renovables“, o que supoñería unha auténtica “transición ecolóxica“.
“Ou quere que sigan importando o aluminio sucio, que se fai con petróleo e con fontes non renovables, que se mete en Europa e véndese máis barato porque está feito en peores condicións, sen pagar unha pegada de carbono como se paga aquí”, insistiu.
“A ALCOA HAI QUE ESIXIRLLE AS CHAVES E QUE MARCHE”
“Alcoa cargou contra o Goberno. Non é nada novo. Carga contra nós, carga contra o Goberno, carga contra todos. O que temos claro é que queremos o 100% da produción e o 100% dos postos de traballo. Levamos esixindo isto desde fai moito tempo”, dixo Zan, polo que o Executivo “agora ten que elixir. Quere ou non quere o 100% da produción e o 100% dos postos de traballo”, reiterou.
Na mesma liña, afirmou que “cando Alcoa veu aquí, regaláronlle este negocio. Pois agora haberá que esixirlle que si non quere seguir, que deixe as chaves e que se vaia. O que non pode deixar é a un país sen aluminio. Iso é inviable”, remarca.
