O número de casos activos de coronavirus na provincia de Lugo ascende a 170, 34 máis ca onte, segundo o reconto ofrecido este xoves polo Servizo Galego de Saúde (Sergas). Con todo, nos vindeiros días a cifra medrará significativamente despois de que se localizase un abrocho na residencia do Incio, con 65 usuarios e catro obreiros afectados.
Dos 170 contaxios, hai seis persoas ingresadas, todas no Hospital Universitario Lucus Augusti (HULA). Cinco delas están en planta e unha na Unidade de Coidados Intensivos (Uci). Un total de 164 pacientes son atendidos en domicilio.
No histórico da provincia documéntanse 29 falecementos, seis deles na Mariña, ademais da morte dun varón que ingresara en Burela por Covid-19 e que pereceu na Uci malia superar a doenza no seu período na unidade de críticos. Déronse 1.268 altas, e número de casos acumulados ascende a 1.467.
Nas residencias da Mariña Lucense hai un único caso, o dunha traballadora do xeriátrico San Bartolomeu de Xove, detectado semanas atrás. Nin os usuarios nin os empregados do centro de maiores resultaron contaxiados.
FALECE UN HOME CON COVID-19 DE 90 ANOS NA CORUÑA
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 1.783, deles 1.045 son da área da Coruña, 170 da de Lugo, 157 da de Ourense, 80 da de Pontevedra, 141 da área de Vigo, 113 da de Santiago e 77 da de Ferrol.
Do total de pacientes positivos, 6 están en Uci, 64 en unidades de hospitalización e 1.713 no domicilio. Polo de agora, en Galicia déronse un total de 11.701 altas, rexistrándose 626 falecementos. A última persoa falecida foi un home de 90 anos que estaba ingresado no Complexo Hospitalario Universitario A Coruña (CHUAC) e presentaba patoloxías previas. O número de PCR realizadas é de 290.491.
