EFE. A organización Adega (Asociación para a Defensa Ecolóxica de Galicia) instou á Xunta de Galicia a revisar a “Autorización Ambiental Integrada” aprobada en xuño deste ano que lle permitiu a Alcoa “seguir superando os límites de emisión de contaminantes ao medio no seu complexo de San Cibrao”, situado na comarca lucense da Mariña.
Adega solicítalle á Xunta de “revise de oficio a Autorización Ambiental Integrada pola que se permite a Alcoa superar aínda máis, de forma descarada e reincidente, os límites máximos de emisión de contaminantes e de vertidos ao medio”.
Segundo a organización ecologista, a “Xunta aceptou na súa integridade os argumentos de Alcoa e permitiu as excepcións solicitadas” pola compañía para “superar os límites de contaminantes para flúor e partículas” no “proceso de fabricación de ánodos”, para “aforrarlle” á empresa “custos de produción“.
“A Xunta deu por bo a chantaxe da empresa”, lamenta Adega, quen opina que a “escandalosa permisividade” con Alcoa “agravou a contaminación ambiental da Mariña”.
Por iso, engade, “ante o risco de que Alcoa insista en abandonar parte do seu negocio de aluminio na Mariña sen saldar a súa débeda ambiental”, tras recibir axudas públicas “por máis de 800 millóns de euros nos últimos dez anos”, a “Xunta debería deixar de choromicar e revisar de oficio” a autorización ambiental “recientemente concedida”.
“Está claro”, di Adega nun comunicado, no que acusa á multinacional dun comportamento depredador, que “a Alcoa canto máis se lle concede, máis quere“.
