A reunión convocada polo Goberno central este martes en Madrid, á que acudiron representantes de Alcoa, dos sindicatos e dos Executivos autonómicos de Galicia e Asturias, non tivo froito.

Segundo confirmaron fontes sindicais, a empresa reiterou a súa intención de pechar as fábricas de Avilés e A Coruña, o que fixo que os representantes dos sindicatos –Agustín Martín (CC OO) e Pedro Hojas (UGT)- marcharan da xuntanza, antes de asegurar que terán unha actitude “belicosa e radical”.

O director de Alcoa España, Rubén Bartolomé, resaltou durante a xuntanza a “improdutividade” das fábricas nas que a multinacional quere aplicar despedimentos colectivos, e ratificou os motivos expresados o pasado día 17 de outubro pola firma para clausurar as factorías.

“PLAN SOCIAL”

A empresa sinalou a súa intención de ofrecer “un plan social” para os afectados polos ERE de extinción, 369 traballadores na Coruña e 317 en Avilés.

O 31 COMEZAN AS CONSULTAS DOS ERE

Así as cousas, o 31 de outubro constituirase a mesa de negociación do conflito laboral. A partir de entón, os traballadores terán un prazo de 30 días para tentar que Alcoa retire os ERE de extinción anunciados.