A Consellería de Infraestruturas e Mobilidade anunciou que iniciará este martes as operacións de limpeza da rede de sumidoiros pluviais en Viveiro, afectados polas riadas que anegaron o municipio na madrugada do 19 de novembro.

Segundo a previsión da Xunta de Galicia, que responde a unha solicitude do Concello, desenvolveranse durante as próximas dúas semanas.

As actuacións comezarán polas estradas de titularidade autonómica. Así, actuarase na LU-540 (Viveiro-Cabreiros), entre os puntos quilométricos 0+000 e 4+000, e na LU-862 Ferrol-San Cibrao, entre os puntos quilométricos 83+000 a 87+000, e nas súas zonas de afección.

O Goberno galego tamén desenvolverá, en colaboración co Concello, traballos noutras vías municipais anexas que precisan destes traballos.

O obxectivo é a limpeza total das canalizacións de pluviais, incluída a aspiración e arrastre de todo tipo de líquidos, a fin de evitar calquera tipo de atasco nas tubaxes.

CAMIÓN ADAPTADO

O Executivo autonómico anunciou que para este propósito contratou un camión especialmente adaptado para este tipo de operacións, que dispón dunha bomba impulsora de auga a presión, e dunha cuba de ata 12.000 litros de capacidade, con dous compartimentos distintos: un para auga limpa e outro para lodos.