‘Miguel’ deixa ventos de 132 qm/h en Viveiro e seguirase a notar o venres

A cicloxénese explosiva tirou árbores sobre a estrada en puntos como O Valadouro, aínda que non houbo que lamentar incidencias graves

A Mariña permanecerá en alerta laranxa este martes por ventos fortes. AXM

A borrasca ‘Miguel’ deixou case 250 incidencias ao seu paso pola xeografía galega, onde este xoves se rexistraron ventos de ata 132,7 quilómetros por hora (qm/h) en Viveiro e abundantes precipitacións que alcanzaron o seu valor máximo cos 75,6 litros por metro cadrado caídos na localidade coruñesa de Santa Comba.

A estación de Penedo do Galo rexistrou ás 17.00 horas o refacho de vento máis forte da xornada en Galicia, un día de moitas incidencias no que a Xunta de Galicia advertiu do risco das actividades deportivas ao aire libre e no que mesmo houbo que desviar dous voos.

Na Mariña Lucense no houbo que lamentar incidencias graves. O vento si se fixo notar ao tirar a última hora da tarde un par de árbores sobre a estrada no municipio do Valadouro, segundo confirmaron desde o Grupo de Emerxencias Supramunicipal (GES) de Cervo.

ALERTA LARANXA ATA A MADRUGADA

A alerta laranxa por temporal costeiro na Mariña Lucense manterase aproximadamente ata as tres da madrugada. Agárdase vento do oeste ou suroeste de forza 8 ou 9, ocasionalmente 10 na contorna da Estaca de Bares, e mar combinado do oeste ou noroeste con ondas de ata sete metros.

A Xunta advirte do risco de achegarse á costa, a diques ou rompentes, ante a posibilidade de que se produza un golpe de mar.

O VENRES, AVISO AMARELO

Para o venres, a advertencia baixará de intensidade, de aviso laranxa a amarelo. A previsión da Axencia Estatal de Meteoroloxía (Aemet) é de temporal costeiro, ata aproximadamente as 10.00 horas, con vento do oeste de forza 7. Agárdase mar combinado do noroeste con ondas de ata cinco metros.

RESPOSTAR

Please enter your comment!
Please enter your name here