Ante o brote de positivos de coronavirus aparecido na Mariña Lucense, con ata 14 casos activos documentados polo Sergas, os Concellos de Foz, Burela, Viveiro, Ribadeo ou Xove pediron á veciñanza “non relaxar” as medidas de protección contra o virus, como o uso de máscaras ou o lavado de mans, ademais de evitar aglomeracións e de manter a distancia interpersoal.
O alcalde de Foz, o socialista Fran Cajoto, pediu a veciños e turistas “que manteñan as precaucións e que sexan rigorosos coas medidas sanitarias, con distanciamento entre persoas e uso de máscara sempre que sexa posible”.
Ademais, Cajoto pediulle de novo ao actual presidente de Xunta de Galicia, o popular Alberto Núñez Feijóo, que “o Sergas e a Consellería de Sanidade poñan todos os medios para que o centro de saúde de Foz, nun momento no que triplicamos poboación, se dote do material e do persoal sanitario necesario; igual que ao noso Hospital Público da Mariña, centro de referencia que en tempo de verán pasa a ser para 200.000 habitantes. Necesitamos eses medios porque senón ante unha onda de contaxios como a que nos están a dicir que se produciu estamos indefensos. Seguimos esperando aínda a resposta á carta que lle enviamos porque non a recibimos. Esperamos que se teña en consideración ante estas noticias”, indicou.
BURELA ABORDARÁ A CUESTIÓN NA XUNTA LOCAL DE SEGURIDADE
O alcalde de Burela -onde apareceron casos positivos de Covid-19-, Alfredo Llano, afirmou que na xunta local de seguridade analizarase “como se pode mellorar a seguridade da poboación fronte ao coronavirus porque hai que recoñecer que na Mariña, concretamente en Xove e en Burela, temos casos positivos, xa hai alguén hospitalizado; e por tanto hai que facer unha chamada de atención porque a única maneira de evitar todo isto é coa responsabilidade individual de cada un, porque está a haber relaxación”, afirma.
Llano explicou que “un dos asuntos que vamos tratar é analizar como se pode facer para motivar e concienciar aos cidadáns porque se nos descoidamos pode haber retrocesos, o que nos volvería prexudicar moitísimo tanto individual como socialmente. Así que apelamos á responsabilidade de cada quen”.
O alcalde indicou que “en Burela hai moita xente que leva máscara, pero tamén hai outros moitos que non o fan. E as aglomeracións de xente en moitos sitios son preocupantes tamén, porque nunca se sabe onde está o coronavirus esperando. Moita da xente que agora dá positivo é asintomática. Por tanto aparentemente estamos todos perfectos pero calquera pode contaxiar”, lamenta.
Desde o centro de saúde de Burela en colaboración co goberno local iniciouse unha campaña de concienciación sobre o uso da máscara.
UNHA MULLER INFECTADA EN VIVEIRO
En relación co brote de Covid-19 xurdido no municipio de Xove e tendo en conta que unha das persoas afectadas reside en Viveiro, a alcaldesa viveirense, a socialista María Loureiro, a rexedora indicou que a veciña afectada “viña empregando todas as medidas de hixiene e seguridade establecidas, tanto na súa vida persoal como laboral; ademais, xa informou ás autoridades sanitarias das persoas coas mantivera contacto. En principio, parece que o brote xurdiu no ámbito familiar, pero xa se están realizando as probas a todas aquelas persoas que se considera que puideron estar en contacto”, concluíu.
Ante esta situación, Loureiro fixo “un chamamento a tranquilidade, pero lembrando sempre a necesidade de non baixar a garda e manter todas as medidas de protección establecidas, utilizando a máscara sempre que non sexa posible manter a distancia social, así como todas as demais medidas establecidas para preservar a seguridade e saúde pública. Esta petición para extremar as precaucións faise extensible, así mesmo, a todas aquelas persoas que chegan ao noso municipio chegadas de fóra”; salientou.
