EFE. A Consellería de Sanidade confirmou tres novos casos positivos de coronavirus en Cantabria, un deles outro dos dez mariñeiros galegos que están confinados desde o fin de semana no albergue de Solórzano, onde outros tres dos seus compañeiros tamén seguen con coronavirus.
O pasado venres deuse a coñecer que un pescador de Burela que chegara a Santoña no seu barco, para descargar o bonito da costera que está agora aberta, dera positivo na covid-19.
O sábado coñeceuse que outros dous compañeiros, dese buque e doutros dous barcos, tamén galegos e atracados nese porto, deran positivo por coronavirus, polo que os tres e outros sete mariñeiros que ían nas embarcacións, foron confinados no albergue que o Goberno cántabro habilitou en Solórzano.
Os tres mariñeiros positivos a fin de semana seguen coa covid-19 e, nas probas realizadas nas últimas 24 horas ata a noite de onte, martes, a outro dos seus compañeiros detectóuselle, a través de PCR, o virus.
Segundo sinalaron a Efe fontes da Consellería de Sanidade, os mariñeiros que deron negativo seguen sen ter a covid-19, aínda que seguirán illados, polo menos ata a metade da próxima semana.
Eses tres novos casos activos detectados pola Consellería de Sanidade elevan a 29 os positivos confirmados en Cantabria, segundo os últimos datos facilitados. Deses activos, hai dúas persoas hospitalizadas e 27 en illamento domiciliario.