InicioPolíticaPecha o colexio electoral de Burela cunha participación en torno ao 50%

Pecha o colexio electoral de Burela cunha participación en torno ao 50%

Das 630 persoas chamadas ás urnas, a última hora da tarde votaran ao redor dos 315 veciños. Espérase "un reconto rápido" e que os resultados se coñezan en cuestión de media hora.

Publicada o

- Advertisement -

Un total de 630 veciños do municipio lucense de Burela foron chamados ás urnas este domingo para votar nas eleccións municipais, debido á anulación do resultado dunha mesa nas eleccións do pasado 26 de maio, ao non poder ser validados seis votos nulos.

En concreto, a mesa (01-005 u), situada no IES O Perdouro, volveu a abrir este domingo, co mesmo censo e cos mesmos membros. Das 630 persoas chamadas ás urnas, a última hora da tarde a participación roldaba o 50%, ao redor dos 315 veciños. Deste xeito, espérase “un reconto rápido” e que os resultados se coñezan en cuestión de media hora.

A presidenta desta mesa, Gloria Ramil, asegurou en declaracións a Efe que todo se desenvolveu con normalidade e “sen ningunha incidencia”. “Todo vai amodiño, pero con normalidade”, asegurou Ramil, que ás 12.38 horas confirmou que votaran 79 persoas.

A única diferenza con respecto á votación do pasado 26 de maio é que este domingo non concorrerá Compromiso por Galicia. Si se presentan PSOE, PP, BNG, Burela Sempre (con algunhas variacións no seu lista respecto ao 26-M), Ciudadanos e Vox.

UN CONCELLEIRO EN XOGO

O municipio xógase nesta votación un concelleiro para formar a definitiva corporación local, que leva sete meses en funcións desde que o pasado 26 de maio a agrupación independente Burela Sempre presentase un recurso ante a xustiza ao non poder ser validados seis votos nulos na devandita mesa.

O Tribunal Superior de Xustiza de Galicia (TSXG) estimou o recurso presentado por Burela Sempre por ese seis votos, que poderían darlle un edil a esta formación.

Os resultados dos comicios do pasado maio déronlle seis edís do PSOE, catro ao PP e tres ao BNG. Concretamente, na mesa que foi declarada nula, depositáronse un total de 157 votos para o PSOE, 107 para o PP, 66 para o BNG e 31 para Burela Sempre.

Segundo o alcalde en funcións de Burela, Alfredo Llano, poden ocorrer tres cousas: “que quede a cousa como está, con 6 concelleiros para o PSOE, catro para o PP e tres para o BNG, que o BNG perda un concelleiro e pase a ser de Burela Sempre ou que o PSOE gañe un concelleiro máis e saque maioría absoluta”.

CASO ÚNICO EN ESPAÑA

Llano asegurou que a participación polo momento, en comparación coas xerais do domingo pasado, van “máis ou menos parellas” e concretou que ás 14 horas votaran aproximadamente 140 persoas. “Sería interesante alcanzar polo menos un 60 % de participación”, sinalou o alcalde.

O pasado xoves a subdelegada do Goberno en Lugo, Isabel Rodríguez, animou os electores censados nesa mesa a que “acudan a votar”, porque co exercicio dese dereito “axudarán a decidir a composición da nova corporación” local e, en definitiva, “o futuro de Burela”.

Burela é o único municipio galego no que haberá eleccións locais parciais este domingo, aínda que tamén terá que repetirse o proceso electoral noutras mesas de distintos concellos españois; con todo, o motivo nestes casos non é unha impugnación do resultado, se non a ausencia de candidatos.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...