Un concerto de Xosé Manuel Budiño, o 3 de agosto, servirá para celebrar a declaración da Feira do Bonito como festa de Interese Turístico Nacional.
O recital do artista, no día grande da feira (o sábado ás 22.00 horas, na carpa), englóbase na intención do Concello de Burela de mostrar o mellor da cultura galega nunha cita que chama a moitos asistentes de fóra de Galicia.
“Este ano traemos a un artista representativo de Galicia e diferente, como é Budiño. Mestura a tradición galega con sons máis contemporáneos, ten unha personalidade propia e moitos seguidores. Hai tempo que non actúa pola nosa zona e cremos que é un bo momento”, expón o edil de cultura, José Díaz.
O concelleiro sinala que a declaración de Interese Turístico Nacional da Feira do Bonito facilita ofrecer actuacións deste tipo, ao tempo que “reforza a nosa idea de traer artistas nosos”.
“FEIRA DE MOSTRAS”
“Queremos que a xente que vén de todo o país e mesmo de procedencia internacional vexa na feira artistas que son representativos do noso”, indica Díaz, que aspira a que o evento sexa “unha feira de mostras no ámbito gastronómico, cultural –co certame de pintura mural Amarte– e tamén musical”.
VOCALISTA NO SEU ÚLTIMO TRABALLO
Budiño está inmerso na presentación do seu disco ‘Fulgor‘, no que mostra outra faceta de si mesmo, xa que por primeira vez -é coñecido polo seu talento como gaiteiro– canta as súas propias cancións, nas que ten menos protagonismo o instrumento co que se fixo un nome no panorama musical.
