O xurado do Certame Internacional de Pintura Mural Amarte elixiu os dez artistas que deixarán a súa sinatura no muro portuario de Burela. Cinco creadores da Mariña Lucense figuran no elenco de finalistas que reproducirán as súas propostas ao tempo que se celebran a Feira do Bonito e Produart, do 1 ao 4 de agosto.
O pintor de Alfoz Hipólito Xeada, que o ano pasado logrou o premio de Mellor Artista Local, o polifacético creador viveirense David Catá e o burelao David Fernández “DaviXiño” repiten no certame, mentras que a artista burelá Adriana Pardo e o deseñador e ilustrador Otto Tretto, cubano afincado en Viveiro, deixarán por primeira vez a súa pegada na contorna do porto.
O lucense Marcos Pereira, gañador da primeira edición, o vigués Delio Rodríguez o navarro Eneko Azpiroz, que tamén recuncan, son outros dos finalistas do certame, anunciados este martes.
Completan o cartel o coruñés Marcos Lamas e o tándem formado por Moisés Vargas e Tim Bergmeier, de Salamanca.
28 PROPOSTAS
O concelleiro de Cultura, José Díaz, felicitouse polo “éxito” da convocatoria á que se presentaron 28 propostas, chegadas maioritariamente de Galicia pero tamén doutros puntos do Estado –Cataluña, Navarra, Madrid, Castilla La Mancha e Castilla y León-.
Ademais de sumar nomes novos e fidelizar participantes, o edil destacou que o nivel “segue subindo con respecto ás pasadas edicións”.
Os artistas comezarán a pintar o xoves 1 de agosto ás 12.00 horas e terán ata o domingo 4 ás 10.00 horas para rematar as obras, todas arredor do mar, como requerían as bases do concurso.
