A organización do Resurrection Fest comunicou este venres que “a día de hoxe tras falar coas autoridades pertinentes, o festival segue adiante con todo segundo o previsto”. Ademais, os promotores do encontro musical anunciaron novas bandas para o cartel do mesmo.
A dirección do ‘Resu’ explicou a través dun comunicado en redes sociais que “estamos en contacto coas autoridades a diario, informándonos sobre a situación actual en todo momento e estudando todas as alternativas posibles para os diversos escenarios. Estamos a máis de tres meses do festival e pedímosvos calma. A nosa intención é seguir adiante. Irémosvos informando canto antes poidamos respecto diso ou se hai algún cambio, así que todo o mundo atento ás nosas redes”, expuxo.
Ademais, confirmou que os xaponeses Crossfaith, os suecos Raised Fist, os británicos Sylosis ou os neoiorquinos Cro-Mags súmanse a programación. Chelsea Grin, pola súa banda, causa baixa no cartel “debido a cambios na súa xira norteamericana”. O festival celebrarase, de non haber cambios, do 1 ao 4 de xullo.
