EFE. O Pescados Rubén Burela FS anunciou este mércores a incorporación do porteiro polaco Michal Marek Kaluza e a continuidade de José Antonio Macías, ‘Joselito‘.
Kaluza, internacional co seu país, procede do Rekord Bielsko-Biala, club de referencia en Polonia, ao que o cadro mariñao, que regresa á máxima categoría do fútbol sala español, agradeceu as facilidades dadas.
O novo gardameta do Burela cumprirá 21 anos este mes. Internacional polaco, no 2018 foi recoñecido como un dos mellores porteiros do mundo nos Futsal Umbro Awards, ocupando a novena posición.
CUARTA CARA NOVA
O novo porteiro do Burela é a cuarta incorporación no equipo galego xunto aos ás Álex Diz (Osasuna Magna) e Éverton (Santiago Futsal) e o pivote Nené (Meta Catania).
JOSELITO, EN PROPIEDADE
Ademais, a entidade laranxa confirmou o acordo ao que chegou con Joselito para que continúe no equipo. O xogador defendeu a camiseta laranxa en calidade de cedido polo Palma Futsal desde finais de xaneiro.
Joselito rescindiu o seu contrato co equipo mallorquín e seguirá en Burela o próximo curso. Na pasada campaña, anotou catro goles en doce partidos.
ONCE FUTBOLISTAS
Pope, Matamoros, Lucho, Iago Míguez, Pitero, Luisma e Joselito continúan así do equipo que ascendeu a Primeira División. Coas incorporacións de Diz, Éverton, Nené e Kaluza, Juanma Marrube dispón xa de once futbolistas.
